ترقبوا معنا عمدة كفر البلاص

ترقبوا معنا عمدة كفر البلاص

مصدر الموضوع الاصلي: ترقبوا معنا عمدة كفر البلاص

تذكير بمساهمة فاتح الموضوع :

( الحلقة الأولى )

( طرق شيخ الخفر الباب
جاءه صوت العمدة من الداخل )
أدخل .
السلام عليكم
و عليكم السلام ، ادخل يا شيخ الغفر تعالى ، هيه ، عملتوا إيه ؟
كله تمام يا حضرة العمدة .
يعني إيه كله تمام ؟ فين التقارير و الإحصاءات بتاعتك ؟
ههههههه ، تقارير إيه يا عمدة ؟ قال عد غنمك يا جحا ...
ها تفضل طول عمرك بلاصي ، شوف بقى أما أقولك ، تلات ساعات ما فيش غيرهم ، و
إذا ما غطست و قبيت و لقيتك حاطط قدامي تقرير مفصل ، قول على نفسك يا رحمن
يا رحيم
لا و على إيه ، سلام عليكم
( خرج شيخ الخفر مسرعا ،
ما هي إلا دقائق حتى عاد ثانية و في يده ورقة واحدة )
اتفضل يا حضرة العمدة .
إيه ده يا روح ست أبوها ؟
التقرير
ورقة ؟ بقى هازز طولك و ركبت الحمار و رايح فين يا شيخ الخفر ؟ رايح أجيب
التقرير ، و راجع ليه يا شيخ الخفر ؟ أصلي كنت بجيب التقرير ، و آخرة
المتمة ألاقي التقارير ورقة يتيمة ؟
ما هي الورقة دي فيها كل حاجة يا عمدة ، بالتفصيل ، و بعدين دي غرقانة
كتابة وش و ضهر
( وضع العمدة نظارته و أخذ يقرأ ، باغته شيخ الخفر )
أموت و أعرف لزمتها إيه المصاريف دي كلها يا حضرة العمدة ؟
ما يموتوا و الا يغوروا فيستين داهية ....
( نظر إليه العمدة حانقا )
و أنا أموت و أعرف أقرا اللي انته كاتبه ده إزاي ؟ نبش فراخ ده يا شيخ
الخفر و إلا إيه بالظبط ؟ ميت مرة أقولك حسن خطك ، حسن خطك ، يعني أخنقك و
أخلص البلد من خطك ...
( أمسك العمدة شيخ الخفر من رقبته ، صرخ شيخ الخفر يحاول الخلاص)
خلاص يا جناب العمدة أنا في عرضك ، مش كاتب أيتها حاجة تاني ...
( أفلت من يديه ، عندها قذفه العمدة بالورقة )
طيب عقابا ليك لازم انته بقى اللي تقراها ...
حاضر يا جناب العمدة حاضر ، أنا اللي استاهل ..
( بدأ شيخ الخفر في القراءة )
نمرة واحد ، حسان أبو شوشة ، و مراته زينب و ابنه خالد و بناته سوسن و
تفيدة ، توب قماش ، شوال رز ، شوال دقيق ، شوال بطاطس ، صفيحة زيت ،

نمرة اتنين ، محمود أبو اسماعين و أخوه عوض ، عشرة متر قماش ، نص رز ، نص
دقيق ، نص بطاطس ، عشر قزايز زيت ...
عملت إيه مع الواد أبو الروس جوز البت جميلة أم المتولي ؟
بس ده يا عمده مش من بلدنا ، ده من كفر أبو حطب ....
و لو يا بقف ، طالما متجوز من بلدنا و قاعد فيها يبقى زيه زينا ، و إلا
يعني أبو الروس مش بنى آدم بياكل و يشرب زينا ؟ و إلا هو ما لوش كرش و انته
بكرشين ؟
أيوه بس أموت و أعرف إيه لزمته ده كله ؟ ما يطفحوا و إلا عن أبوهم ما
طفحوا ، ليه المصاريف دي كلها ؟ هو انته خلفتهم و نسيتهم ؟
ما فيش فايدة ، الله يرحمه قال ما فيش فايدة ،
أفهمك يا طربش ،
القط اللي كانت أمك ست أبوها مربياه في بيتكم فاكره ؟
قطع و قطعت سيرته ، ده أنا نزلت عليه دب بالفاس لحد ما فطسته ...
ليه ؟
مش لاقيناه واكل الكتاكيت .
طيب ما عرفتوش هو كلهم ليه ؟
عشان كان جعان .
الله ينور عليك ، طيب لو انته مأكله و شبعان أول باول ؟ كان ممكن يعملها ؟
لأ طبعا ، ما هو كان طول عمره عايش معانا من أيام أبويا الله يرحمه ، و لا
عمره قل بأصله .....
أيوه ، لأن أبوك كان مراعيه مأكله و مشربه و مهنيه ، لكن ست أبوها كانت
مصدرة له الطرشة ......
و هو ربنا بينسى حد يا جناب العمدة ، ده ربك ها يرزقه لو في بطن الجبل .
أهو انته عملت زي اللي واقف على القضيب و شايف القطر هاجم عليه و مش عاوز
يتحرك و بيقول لو ربنا عايز القطر يفرمني ها يفرمني ، أمال ربنا خلق لنا
عقل ليه ؟ و ليه خلى الإنسان خليفته في الأرض ؟
طيب و إيه دخل القط في العاطلين اللي عندنا في البلد يا عمده ؟

الناس دول قاعدين لا شغله و لا مشغلة ، عطلانة يعني ، أو زي ما بيقولوا في
الجرايد ( بطالة ) ، لا عندهم أرض يأجروها أو يزرعوها ، فيهم اللي مريض أو
تعبان أو مش لاقي شغل ، يعني ناس جعانة بصريح العبارة كده ، لا هدمة
تسترهم و تستر عيالهم و لا لقمة تسكت كلاب الجوع السعرانة اللي بتقطع في
معدتهم ...
( يشير شيخ الخفر بسبابته إلى رأسه )
عشان كده بتأكلهم و تشبعهم قبل ما ندخل عليهم في يوم نلاقيهم كلوا
الكتاكيت زي القط بتاعنا ، صح يا حضرة العمدة ؟
تسلم دماغ اللي نفضك ، دي إيه النباهة دي كلتها ؟
أيوة بس برضك دي مصاريف كتيرة قوي يا عمدة ..
كام يعني ؟
لو عملناها مرتين ، يعني ممكن يكلفوك حوالي خمس ست الاف في السنة .
عليك نور
طيب و لو سبناهم هايجين زي مقاطيع كفر أبو حطب ؟
احسب كده بقى مصاريف حادثة واحدة من اللي عملوها هناك ...
دول لما سرقوا دوار عمدتهم بس ، خدوا عشر جمايس على الأقل بمتين ألف .....
و حصان و حمارين ، ده غير دهب مرات العمدة ، و غير العربية اللي اتقلبت في
الترعة و همه بيطاردوهم ، و السين و الجيم و التحقيقات و الاقلام و الورق و
الملفات ، و مدير الأمن و المأمور و وكلاء النيابة و الظباط و العساكر و
الشهود و عطلة الناس ....
ده كله كوم و التلات غفر اللي ماتوا لما ضربوا عليهم نار كوم تاني ،
و نسوانهم اللي بقوا أرامل و العيال اللي اتيتمت
شوف انته بقى الناس الي ماتوا دول ، الواحد فيهم يسوى كام ؟
لو قلنا الغفير الواحد بألف ( ينظر للسقف ) يبقى التلاتة بتلات الاف .
هو إيه اللي بألف ؟
( احمر وجه العمدة حتى كاد الدم أن يتفجر من خديه )
مالك يا حضرة العمدة ؟
هو إيه اللي بألف يا شيخ الغفر ؟؟؟؟
الغفير ، الواحد بألف .......
( أخذ الشرر يتطاير من عين العمدة ، أخذ يبحث حوله ، لم يجد ضالته ، عندها
انحنى يخلع حذائه ، أمسكه بسرعة بين يديه ، أطلقه ناحية وجه شيخ الخفر ، و
أخذ يصيح )
مافيش فايدة ، مافيش فايدة ...
( انتفض من مكانه ، هجم على رأس شيخ الخفر ينزع شعر رأسه ، شعرة شعره ،
يردد )
فيه فايدة ، ما فيش فايدة ، فيه فايدة ، ما فيش ....
( أخذ شيخ الخفر يصرخ من شدة الألم )
خليهم ألفين ، خليهم ألفين ...
( حاول جاهدا الفرار ، أخيرا ينجح ، يخرج مسرعا ، يجري بشوارع القرية ،
يصرخ )
خليهم ألفين ، خليهم ألفين ، خليهم ألفين ...

( الحلقة الثانية )

( دخل شيخ الخفر مسرعا على العمدة دون أن يطرق الباب، يصرخ )
إلحق يا حضرة العمدة ، إلحقنا يا كبير البلد ...
( عندها انتفض العمدة واقفا ، يضربه ، و يصرخ في وجهه )
إنت إيه ؟ هه ؟ جنسك إيه قولي ؟ فهمني ، البعيد جبلة و إلا إيه بالظبط
يعني ؟ فهمني يا وله ، ( أمسكه من جلبابه و أخذ يهزه ) خلاص ، ما فيش إحساس
؟ ما عندكش و لو شوية م الأحمر ؟ إنت البعيد و لا إحساس و لا دم و لا
أيتها حاجة خالص ؟؟؟؟؟
مالك يا حضرة العمدة ؟ فيه إيه بس ؟
أنا اللي مالي و فيه إيه ؟ مش باقولك ، صحيح اللي اختشوا ماتوا ...
طب بس قولي إيه اللي مزعلك ؟
أنا مش منبه عليك مليون مرة قبل كده ، لما تحب تدخل عليا تخبط الأول على
الباب ؟ حصل و إلا ما حصلش ، لنفرض إني كنت قاعد كده و إلا كده لا سمح الله
، و إلا خالع الطاقية و راسي عريانة ...
معلش سامحني يا حضرة العمدة ، بس الموضوع خطير جدا جدا ، و عشان كده سها
عليا و نسيت ...
( ترك العمدة جلباب شيخ الخفر )
موضوع إيه ؟
لا ، ما هو أني مش ها أقول أيتها حاجة إلا أما تسامحني الأول .
خلاص سامحتك .
لا ، دي طالعة من غير نفس ، لازمن تقول سامحتك يا حضرة شيخ الخفر و
بعدي..........
( عندها دفعه العمدة من صدره ناحية الباب )
نت ها تتأمر عليا كمان ، طب جزاءا ليك و الله لتطلع بره و تخبط زي ما
علمتك ، ياله بره ، و خبط زي البني آدميين ، ياله ...
( أخرجه العمدة ، أغلق الباب خلفه ، ذهب العمدة ليجلس على كرسيه ،
لحظات مرت و لم يطرق شيخ الخفر الباب ،
دقائق تمر و دقائق و لا فائدة ،
عندها استشاط العمدة غضبا
اتجه ناحية الباب ،
فتح الباب ، و إذا بشيخ الخفر يقف أمام الباب ، صرخ العمدة في وجهه )
فيه إيه يا شيخ الغفر ، ما خبطتش ليه ؟
بقى لي ساعة بخبط يا عمدة ، بس انته ما قلتليش ادخل
هو انته بتخبط إزاي يا شيخ الغفر ؟ وريني كده .
( طرق شيخ الخفر الباب بكل هدوء )
يا سلااااااااااااااام ، يا سلام سلم يا ولاد ،بقى عايزني أسمع تخبيطك ده ؟
طب إزاي فهمني ؟ ( أمسك بأذني شيخ الخفر ، يهز رأسه ) إنته ناوي تشلني
ياجدع إنته ؟ هه ، فيه حد موحيك عليا ؟ و الا حكايتك إيه بالظبط معايا ،
فهمني ....
آي ، آي ، حرامك عليك يا حضرة العمدة ، هو أنا عملت إيه تاني بس ؟
كل ده و مش عارف عملت إيه ؟
يعني أعمل إيه أنا بقى أقطع نفسي ؟
ده أنا اللي ها أقطعك حتت حتت ، و أرميك لكلاب السكك تنهش لحمك .
هو لا كده عاجب و لا كده عاجب ؟ مش انته اللي قايل لي ابقى خبط بشويش ؟
أيوة تخبط بشويش يعني بالراحة ، مش تخربش زي القطط على الباب و عايزني
أسمعك ....
حاضر يا حضرة العمدة ، حاضر ، فهمت خلاص .
أما أشوف .
( دخل العمدة يجلس مكانه ، لحظات و طرق شيخ الخفر الباب )
مين ؟
حضرة العمدة موجود يا عمدة ؟
نقوله مين يا شيخ الغفر ؟
قوله شيخ الغفر عاوزك ضروري .
ادخل يا شيخ الغفر ، تعالى .
( يدفع شيخ الخفر الباب بكل هدوء )
السلام عليكم يا حضرة العمدة .
و عليكم السلام ، اقعد يا شيخ الغفر .
( يجلس )
فيه إيه بقى ؟
فاكر لما قلت لي وزع دقيق و سكر و رز و زيت على الجماعة إياهم ؟

أيوة طبعا فاكر .
عارف كانوا كام واحد بنوزع عليهم يا عمدة ؟
كام ؟
كانوا اتناشر نفر .
طب و إيه يعني ؟
اصبر بس يا عمدة ، عارف بقوا كام دلوقتي ؟
كام ؟
بقوا متين و خمسين نفر يا عمدة ، و بكرة يبقوا ألف ..
متين و خمسين ؟ ليه ان شاء الله ؟
وحد خاسس عليه حاجة يا عمدة ؟ ما هم قاعدين يا كلوا في قتة محلولة ، أكل و
مرعة و قلة صنعة .
أيوة بس جم منين دول ؟
اللي جاي من كفر أبو حطب و اتجوز له بت من بلدنا ، و اللي جاي من أبو
زعيبل ، ما هي بقت تكية خلاص ...
و انته إزاي تسكت لغاية لما توصل لكده يا شيخ الغفر ؟
انته مش قايل كل اللي تنطبق عليه الشروط أعطيه ؟
أيوة بس مش بالشكل ده ؟
مش بس كده يا عمدة ، ده الغفير عوضين قال لي إنه شايف ناس بره البلد
قاعدين يبيعوا الدقيق و السكر و الزيت اللي إحنا وزعناه عليهم و بينادوا و
يقولوا ( دقيق و زيت عمدة كفر البلاص )
لا حول و لا قوة إلا بالله ، بقى دي أخرتها ؟
و العمل إيه دلوقتي يا عمدة ؟
عملك اسود و مهبب ، وقف الموضوع فورا ، و إياك عدت تعطي لأي واحد فيهم
أيتها حاجة ، و لا حباية سكر واحدة ، فاهم و إلا لأ ؟
أنا قلت من الأول ما فيش فايدة ،
كل ما أحاول أصلحها من ناحية يبوظوها من الناحية التانية ،
ها أقعد أرقع فيها كده لحد إمتى ؟
( قاطعه شيخ الخفر )
بتقول حاجة يا عمدة ؟
هو انت لسه هنا ؟ ما تنجر يلا من هنا .
حاضر يا حضرة العمدة حاضر ،أديني ماشي أهوه ....
( خرج شيخ الخفر بينما جلس العمدة يفكر )