مصدر الموضوع الاصلي: عن البلد والناس والدموع والصلاة والبنات والكلام

عن البلد والناس والدموع والصلاة والبنات والكلام


فيه بلد تتولد فيها وبلد تعيش فيها لأن حبايبك أحياء أو أموات موجودين فيها
وبلد تقضي فيها يومين لما تكون تعبان أو تاخدلك فيها أسبوع في الصيف، بس مسيرك تسيبها وترجع
وفيه بلد تفديها بروحك مع إنك لا اتولدت فيها، ولا عمرك رحتها، ولا تعرف فيها حد
بس يمكن حبايبك فيها صخور وشجر وبيوت!!


************


فيه واحد تصاحبه عشان لما تتخانق يقف ويضرب معاك، وفيه واحد تصاحبه عشان تفتكر بيه ربنا
وفيه واحد تصاحبه عشان يعرف محلات أكل تحفة... دا غير إن هو بيعزمك أصلاً
وفيه واحد تصاحبه عشان يبقي فيه في أصحابك حد محترم، وفيه واحد تصاحبه
عشان أمك وأبوك والدنيا كلها بتقولك «ماتصاحبش الواد دا!!!».


*************


فيه دمعة بتغلبك وتفر من عينك وانت بتحارب عشان تكتمها، وفيه دمعة بتتحايل عليها عشان تنزل
وهي مش عايزة تتكون في عيونك أصلاً، وفيه دمعة بتنزلها أدام الناس اللي بيحبوا يشوفونا بندمع
عشان نريحهم مش أكتر، وفيه دمعة مش بتنزل من عينك ولا تتكون
بس بيشوفها كل اللي بيحسوا حواليك.


*************


فيه ركعتين تصليهم عشان تحل في الامتحان، وفيه ركعتين تصليهم عشان عايز تحس
إنك واقف بين إيد الجبار وفيه ركعتين تصليهم عشان محتاج تصرخ وتفضفض
وفيه ركعتين تصليهم عشان أمك مش مقتنعة إن انت صليت وانت جاي من برة
ومش هاتسكت إلا لما تشوفك بتصلي!!


**************


فيه بنت تحبها وتغني اسمها وترسم لها صورة في دفتر دروسك من قبل ماتشوفها
وفيه بنت تعرفها عشان معرفة الرجال كنوز!، وفيه بنت ماينفعش غيرها تكون
نصك التاني وأم عيالك وعمود بيتك، وفيه بنت بتدور عليها وتحاول تعرفها...
عشان أصحابك كلهم يعرفوا بنات وانت لأ.


***************


فيه كلام بتكتبه لروحك وكلام بتكتبه لـ«حد» وكلام بيتكتبلك
وكلام لا بتكتبه ولا بيتكتبلك بيتحس بس!!




أحمد شهيب

مصدر الموضوع الاصلي: عن البلد والناس والدموع والصلاة والبنات والكلام

دائــمــأ مـتـمـيـز بـمـواضـيـعـك الـرائـعـة

سـلـمـت يـداك عـلـى هـذا الـمـوضـوع الـرائـع

ولا تـحـرمـنـا مـن جـديـدك الـمـبـهـر

تـقـبـل مـرورى فـى صـفـحـاتك الـرائـعـة

مصدر الموضوع الاصلي: عن البلد والناس والدموع والصلاة والبنات والكلام

شكرا علي المرور المميز
والرد الرائع